Ghazal - Jo Bhi Uss Chasham
May 19, 2007 on 5:45 pm | In Hum Uss Kay Hein |جو بھی اُس چشم خُوش نگاہ میں ہے
حاکمِ وقت کی پناہ میں ہے
فرق سائل کی ہے صدا میں کُچھ !
یا کمی ظرفِ بادشاہ میں ہے !
اُس کو اہلِ ہوس نہ سمجھیں گے !
لُطف جو فاصلے کی چاہ میں ہے
داستاں ، شب کے جاگنے کی ، رقم
آنکھ کے حلقئہ سیاہ میں ہے
حالتِ جنگ ہی میں رہتا ہے
جب سے دل درد کی سپاہ میں ہے
نہیں وہ خواہشِ نجات میں بھی
جو کشش دامنِ گناہ میں ہے !
بے نیازی سہی طبعیت میں
دِلبری بھی تو اُس نگاہ میں ہے
رُوح بیدار ہوتی جاتی ہے
دل کِسی روشنی کی راہ میں ہے
تیغ دو دم سے بھی سِوا خطرہ
حلقئہ قُربِ بادشاہ میں ہے
بہت آساں ہے مُدّعی ہونا !
جتنی مشکل ہے ‘ سب نباہ میں ہے
کیا یقیں ہو کسی پہ جب ،امجد
اپنا ہونا بھی اشتباہ میں ہے !
No Comments yet »
RSS feed for comments on this post. TrackBack URI
Leave a comment
Presentation of Urdu Poetry Forum - Get RSS Feed:
Entries and comments feeds.
^Top^