Amjad Islam Amjad

Ghazal - Woh Damakti Hoi Love Kahani Hoi

May 12, 2007 on 1:02 pm | In Hum Uss Kay Hein |

وہ دمکتی ہوئی لَو کہانی ہوئی وہ چمک دار شعلہ، فسانہ ہُوا

وہ جو اُلجھا تھا وحشی ہَوا سے کبھی، اُس دِیے کو بُجھے تو زمانہ ہُوا

ایک خوشبو سی پھیلی ہے چاروں طرف اُس کے امکان کی اُس کے اعلان کی

رابطہ پھر بھی اُس حسنِ بے نام سے، جس کا جتنا ہوا،غائبانہ ہُوا

باغ میں پُھول اُس روز جو بھی کِھلا اُس کے بالوں میں سجنے کو بے چین تھا

جو ستارا بھی اُس رات روشن ہُوا، اُس کی آنکھوں کی جانب روانہ ہُوا

کہکشاں سے پرے، آسماں سے پرے، رہگزارِ زمان و مکاں سے پرے

مجھ کو ہر حال میں ڈھونڈنا تھااُسے، یہ زمین کا سفر تو بہانہ ہُوا

اب تو اُس کے دِنوں میں بہت دُور تک، آسماں ہیں نئے اور نئی دُھوپ ہے

اب کہاں یاد ہوگی اُسے رات وہ جس کو گزرے ہوئے اِک زمانہ ہُوا

موسم وصل میں خُوب ساماں ہوئے، ہم جو فصل بہاراں کے مہماںہوئے

گھاس قالین کی طرح بچھتی گئی، سر بہ ابرِ رواں، شامیانہ ہُوا

اب تو امجد جُدائیکے اُس موڑ تک دَرد کی دُھند ہے اور کُچھ بھی نہیں

جانِ من، اب وہ دن لوٹنے کے نہیں، چھوڑئیے اب وہ قصّہ پرانا ہُوا

Presentation of Urdu Poetry Forum - Get RSS Feed: Entries and comments feeds. ^Top^